هنا الوطن منصـــــــور

عشقتها رغم القساوة
و صنتها لما رفعت الصوت
كل الحبايب قالوا
دى عمرها ما تموت
طول ما نبض عشاقها
يتحدى قهر السكوت
حبيتها موت
و زعلت منها و قلبى شال
حزن بوزن الجبال
مــر و تقيل الأحمال
و ألاقيها دايما متربعة ف القلب
مغروسة فى نوايا الروح
و ما تفرقش
طاير
سعيد ، فرحان
مشلول
جريح ، مدبوح
رافع
راية العصيان
أو محبوس
فى زنزانة
بين الضلوع ساكنانا
جذرها ممتد
لآخر حدود جوانا
طول عمرها الداء
ووحدها مالكة
سر الدواء
طول عمرها بلوانا
و حلمنا و هوانا
و قهرنا و هنانا
طول عمرها جرحانا
و مطببانا
و مبلسمانا
نشتكى منها لها
نحتكم ليها بها
ننتظر حكمها
و نستناها فى المواعيد
فاكرها و أنا طفل و عنيد
كانت جريحة حرب
قامت قوام
تبنى نفسها من جديد
صمودها كان النشيد
عنوانها كان التصدى الشديد
و هدفها كان الردع البعيد
و كل من له بصيرة شاف
الملحمة اللى إسمها " استنزاف "
و فى يوم صحيت على صوت معارك
كان نفسى أشارك
كان نفسى أعارك
كان نفسى آخد بتار عمى الشهيد
و لما سمعت صوت زغاريد
روحى طارت فى السما
كل حكاوى الانتصار متبسمه
متنسمه
متقسمة
تملا براح الخيال
بفيض بطولات الرجال
شفنا العدو مأسور
و مذلول
شفنا دموعه سيول
و خوفه فار مذعور
و بعدها و الفرحة لسه ماتمتشى
شوفنا الخيانة الجبانة
من كمال فرحتنا حرمانا
و من طريق نهضتنا مانعانا
و انقلبت الموازين
مين اللى خانك مين
غير غراب البين
مؤسس الخراب
و النهب و الضباب
و الوهم و السراب
يقول عام الرخاء
و هوه عارف انه بداية البلاء
يقولو عليه فى غاية الذكاء
و تمر السنين و كل الدنيا تعرف
أنه أغبى م الغباء
و أخطر من العملاء
باعنا ببلاش
من غير حوار و لا نقاش
عامل كبير العيلة
و شيخ شيوخ القبيلة
يبان كأنه رابط الجاش
و نهايته كانت سكة اللى راح
و ما جاش
مين اللى باعك
للعدو غيره
من اللى سلم للعدو
من زرعنا خيره
مين اللى خلى بوابتك الشرقية سداح
مين اللى خلى حراسك من غير طلقة سلاح
مين اللى خلاكى من بعد عزتك ف انفتاح
مين اللى مسح بأستيكة خطك الناصر
و مين اللى خلى حلم أمتنا يتحاصر
و مين اللى بعده خلى حياتنا سواد
عايش فى دور الحكيم
و هوه لئيم
تلاتين سنه و حياتنا أصبحت ف جحيم
عايش فى عالم خيالى
و لكل شيىء لا يبالى
مش فاضى حتى يفكر
الا فى التوريث
عايش بلا مواريث
لا مشروعية
و لا انجازات
و لا حاجة واحدة تخللى
قدام عنينا أماره
سنين خسارة ف خسارة
و ف وسط ده كله
حاولنا
و ما زالنا
نلاقى سكة للأمل
نقبض يإيدنا على جمرة الحلم العليل
نسافر مع جراحنا
نعافر داخل حصارنا
يعدى يوم ورا يوم
و تزيد همومنا هموم
و تكتر فى سمانا الغيوم
و تنطفى لمعة النجوم
نطل فى وش أولادنا
نحس بالوجع مالى أكبادنا
ياسنين تجر سنين
أمتى الخلاص م الأنين
مع كل طالعة شمس
بيزيد الحنين
و الشوق
مخنوق يا حلم المهمومين
مخنوق
و مين يفك الطوق
و يمد جدر عشاقك لفوق
يحضّر الفجر لمهرجان الشروق
يجهّز نفق روحنا للحظة مرور النور
يكسّر الحواجز
سور وراه السور
نكتب ف صفحة جديدة
كلمة الحق فى أول السطور
و كلمة العدل تدخل ف كل الجحور
تطمن المذعور
تنصف المقهور
تجبر المكسور
و تحضن المغدور
و راية الصفحة مطبوع عليها النسور
نكتب فى عنوانك
هنا الوطن منصور
هنا الوطن منصور

عبدالمجيد راشد
[ندعوك للتسجيل في المنتدى أو التعريف بنفسك لمعاينة هذا الرابط]

جزاك الله خيرا يابن الخطاب

فعلا هنا الوطن منصور
هنا الوطن منصور ومحمود ومحمد

اتنوا غيرتوا اسم الوطن امتى

اللهم انصر وطننا على جميع الأعداء

اللهم حقق فينا اسباب النصر

قلب الوطن مجروح
لا يحتمل أكتر
نهرب وفين هنروح
لما الهموم تكتر
الشاعر
عبد الرحيم منصور