مترو الأنفاق

حفظت ابنتي هاجر ١٢ سنة - نصف آيات القرآن الكريم حتي سورة الكهف، فوجبت الهدية التي وعدتها بها وهي موبايل مستعمل سعره حنين من شارع عبد العزيز.. ركبنا مترو الأنفاق فسألتني ابنتي، وهي بالمناسبة كثيرة الأسئلة : ح ننزل فين يابابا؟ إن شاء الله محطة محمد نجيب - مين محمد نجيب؟! - هذا يا ابنتي أول رئيس لمصر، وكان عظيما ولو التصق بالكرسي لتغير وجه مصر الحضاري - علشان كده يابابا أخد محطة أنفاق - بالضبط يابنتي - طب ليه عبد الناصر اخد محطة مع إن جدو بيقول انه خرب مصر - تلعثمت وأخذت فاصلا قصيرا خاصة بعد أن لاحظت إصغاء بعض الركاب للحوار وقلت هامسا: اللي بيعمل إنجاز للبلد واللي بيخرب البلد طالما رئيس لازم ياخد محطة ولما نروّح لي كلام مع جدك.



اقترب مني عجوز وسألني : هي محطة رمسيس قربت؟ اللي جايه ياحاج - عاودت ابنتي الأسئلة: هو رمسيس اخد محطة؟ - لا يابنتي هو يقصد محطة مبارك وزمان كان اسمها رمسيس - مين رمسيس يابابا؟ - والله يابنتي أنا سمعت ان فرعون كلامنجي وصاحب بق وإنجازاته كلها كان بيكتبها علي جدران المعابد، وكلها كانت فشنك وغير ملموسة.



وعلي ما يبدو الجدران زمان كانت بمثابة الصحف القومية عندهم، والإنجازات غير الملموسة عادة فرعونية الأصل - والله يابابا يستاهل ياخدوا منه المحطة - لو سمحتي يابنتي كفاية أسئلة أحسن ارجع في كلامي واروح - سؤال واحد: لو عمو جمال مسك مصر برضه ح ياخد محطة أنفاق - بالطبع يابنتي - طب حياخد محطة مين؟!



وللمرة الثانية وبعد فاصل قصير أجبت: أكيد ح يعملوا استفتاء شعبي بين احمد عرابي و محمد نجيب. لازم واحد فيهم يتنازل لعمو جمال. وعن نفسي أتوقع إن احمد عرابي ح يكون مصيره زي رمسيس، علشان له قول مأثور في وجه الخديو توفيق قال فيه: لسنا عبيدا لأحد ولن نورث بعد اليوم وكلمة لن نورث دي هي الكلمة اللي ح تخلعه من المحطة. وبيني وبينك يستاهل لأنه ما عملش لآخرته.



اشترينا الموبايل وفرحت به ابنتي وعدنا في المترو كما ذهبنا وكان مزدحما وفي محطة دار السلام خف الزحام لكنني وجدت صغيرتي تبكي.. ولما سألتها عن السبب قالت إن الموبايل اتسرق - إمتي وفين.. حرامي تقريبا لطشه من جيبها في محطة الملك الصالح.. وعادت ابنتي للأسئلة: هو مين الملك الصالح ده يا بابا؟ قلت: أكيد يابنتي بعد سرقة الموبايل بقي ملك فاسد.

لا بجد رااااااااائعه جدااااااااا

ادى اخره اللى بيسألوا فى الزمن ده