مشهد 1
نهار داخلي
المكان : مجموعة من الموظفين في احد شركات الأسكندرية .
الزمان : شهر اغسطس من عام 2030
(الأبطال : أنا وشوية ناس تانية مالهمش لازمة ( كومبارس يعني
الموظفين جالسون على مكاتبهم يأكلون الساندوتشات ويقرأون الجرائد
موظف 1 : إيه رأيك يا استاذ محمود ماجد في اللي بيحصل دلوقتي في شبرا ده ؟؟
محمود : والله ربنا ينصرهم على أعدائهم انا شايف والله إن المقاومة المسلحة في شبرا ممكن تحقق إنجاز كبير اوي وتعمل انتصار على العدو الإسرائيلي
موظف 1 : يسمع من بقك ربنا والله يا استاذ محمود من سنين طويلة والواحد نفسه يسمع عن إنتصار للعرب على اليهود من سنين طويلة ما سمعناش العرب بينتصروا
موظف 2 : بس انا شايف والله يا جماعة إن جماعة تحرير شبرا غلطانين برده يعني إزاي يعني يسيبوا الشباب بتوعهم يروحوا يشربوا من مية النيل ؟؟ ما هو لما شبابهم يروحوا يشربوا من مية النيل معنى كده على طول إنهم بيستفزوا إسرائيل علشان تحاربهم
موظف 1 : يا عمي شباب صغير ومتهور وتلاقيهم سمعوا من أهاليهم إن النيل ده كان في يوم من الأيام بتاع المصريين فراحوا يشربوا منه
موظفة 1 : تلتفت في انتباه شديد وتستدير تاركة المرآة التي تظبط فيها شعرها ...إيه ده ؟ النيل ؟؟ النيل اللي في إسرائيل ده كان بتاع المصريين ؟؟ إيه الكلام الغريب ده يا جماعة ؟
محمود : اهو ده عيبكم يا جيل اليومين دول ..يا بنتي النيل ده انا عديت عليه اكتر من ست سبع مرات زمان وانا لسه شباب لما كنت بزور القاهرة
موظفة 1 : يعني كنت في رحلة سياحة لأسرائيل يعني وعديت من عليه ؟
محمود : رحلة سياحة إيه يا بنتي ...النيل ده كان بتاع المصريين والله العظيم قبل ما اسرائيل تحتله سنة 2013
موظفة 1 في غضب مصطنع : انتم بتشتغلوني شكلكم يا جماعة والله انا كده حزعل منكم
موظف 1 : والله يا بنتي ما بنشتغلكيش ..ابقى اسألي باباكي وهو يقولك
موظفة 1 : ما انت عارف يا اونكل انا مابشوفش بابا غير اسبوعين كل سنة لما بيرجع من السفر
موظف 2 : أهو ده بس اللي فالحين فيه الأهالي يسافروا الصومال وأثيوبيا يشتغلوا هناك ويرجعوا بشولة فلوس ويسيبوا عيالهم جهلة كده
!!!!موظف 1 : طيب وحنعمل إيه يا جماعة إحنا حنقعد ساكتين كده وشبرا بتنضرب ؟؟
محمود : لا طبعا إحنا حنروح فيه وقفة إحتجاجية في نادي المحامين النهاردة ..ده اقل حاجة نعملها لشبرا يا جماعة ..الوقفة الأحتجاجية بعنوان لن تسقط شبرا
قطــــــــــع
مشهد 2
ليل خارجي
..نادي المحامين بالأسكندرية على الكورنيش
أمن مركزي كثيف يحيط بنادي المحامين على كورنيش الأسكندرية ولا يسمح بدخول الناس إلا فرادى لا فتات معلقة على جانبي النادي ..بالأمس رمسيس والعتبة ..واليوم شبرا ...وغداً الدور على من ؟؟؟
ينزل رجل في أواخر الأربعينيات ( انا ) يدخل مقر النادي يلتفت يميناً ويسارا يذهب إلى مجموعة من الأشخاص الواقفين يلتقونه بترحاب ويعانقونه .
شخص 1 : إزيك يا محمود واحشنا يا راجل ..يعني احنا ما نشوفكش يعني غير في المظاهرات بس .
محمود : ياااه يا جماعة كل ما باجي النادي بفتكر ايام الجامعة زمان فاكرين ؟؟؟ اول وقفة إحتجاجية كانت هنا ؟؟لما شارون اقتحم المسجد الأقصى وحصلت الإنتفاضة في فلسطين .
طفل 1 لأبيه الواقف مع المجموعة : بابا يعني إيه فلسطين ؟؟؟
شخص 2 ( الأب ) ينظر للطفل شذراً ويتجاهله وينظر لمحمود ويقول : يااااه يا حودة انت لسه فاكر الله يخرب عقلك ده كان سنة كام ده ؟؟؟ تقريبا 2005 أو 2010 صح ؟
محمود : آه تقريبا كان في الحدود دي كده يااااه كانت أيام فاكر أيامها كان كيلو اللحمة بأربعين جنيه شوف دلوقتي بقى بكام ....انا جيت هنا اول ما جيت اتظاهرت علشان فلسطين وبعدين العراق وبعدين لبنان وبعدين بقى حبة حاجات كتير اوي كده وقعوا ورا بعض كنا كل شهر والتاني نيجي نعمل وقفة إحتجاجية فاكرين يا جماعة .
شخص 2 : سيبك انت من الماضي سمعتم يا جماعة التصريح اللي قاله الراجل اسمه إيه قائد حزب تحرير شمال شبرا ؟؟ بيقول إنه ذاهب إلى بورسعيد وما وراء بورسعيد !!! تفتكروا عنده صواريخ توصل لبورسعيد ؟
الجميع يغمغم في استنكار
شخص 3 : صعبة أوي دي يا جماعة ده مجرد كلام إعلامي ..دي بورسعيد دي رئة إسرائيل ...هي حتسيبه يضربها بالساهل كده ؟؟ مستحيل طبعا
محمود : تفتكروا ياجماعة لما إسرائيل تحتل إسكندرية ممكن يسيبونا نعمل وقفة إحتجاجية في نادي المحامين برده .
الجميع يضحكون بصوت عالي...
شخص 1 : ههه يا عم محمود إنت بس متشائم كده طول عمرك ..إحنا فين وإسرائيل فين بس . وبعدين الجيش الإسكندراني متسلح اوي وقوي جدا وإسرائيل تعمل له ألف حساب .
محمود : طيب انا من سنين لما سقطت السويس قلتلكم اقابلكم لما شبرا تسقط في نادي المحامين ؟؟ قلتم إيه بقى ساعتها ..فضلتم تتريئوا علي وتضحكوا ..أديها اهي بتضرب شبرا .
شخص 2 : آه انت عندك فراسة برضه تحسد عليها مش انت برده قلتلنا زمان ايام الجامعة لما إسرائيل ضربت جنوب لبنان اقابلكم هنا لما نكون بندعم المقاومة في السويس ؟؟؟ بس برضه حرام عليك يا راجل حرام عليك انت عايز تجيب أسكندرية زي شبرا برضه ده اليهود لو جم هنا والله اقرقشهم كده ؟؟
محمود : طيب بكرة تشوفوا .
شخص 1 : انتم حتفضلو تتكلموا كده يلا نقوم بواجبنا ونهتف مع اللي بيهتفوا .
هتاف يتصاعد من الميكروفون والجميع يردد . في صوت خلف الميكروفون .
يا يهودي يا خسيس ..والله لنضرب في السويس .
تامر اولمرت اتلم اتلم ....حنخليها دم بدم ...
بالصواريخ والحديد ...دمر دمر بورسعيد.
واحد اتنين ...الجيش الليبي فين
الكاميرا الموجودة على سطح العمارة المقابلة لنادي المحامين تعمل زووم أوت ببطء ...جموع المتظاهرين الواقفين في نادي المحامين المكشوف السقف...تملأ الكادر ..تتصاغر صورتهم جداً مع استمرار الزوم أوت ليظهر في الكادر جزء كبير من كورنيش الأسكندرية والزووم أوت يبتعد أكثر ، تستدير الكامير تدريجيا بعيدا عن المتظاهرين ومن بعيد جدا يلوح ميدان المنشية ويظهر نصب الجندي المجهول التذكاري الأبيض الشهير و ويبدو اجسام معدنية تتحرك ، زووم إن على الميدان والنصب التذكاري تبدأ الأشياء في الوضوح ، دبابات مرسوم على جانبها نجمة داوود ومكتوب تحتها بحروف عبرية تبدأ في المرور من بجوار الميدان الشهير وتتجه إلى الإسكندرية ...وما بعد الإسكندرية .
موضوع: ذاهبون إلى بورسعيد و....ما بعد بورسعيد 
السبت نوفمبر 15, 2008 11:08 am
