بسبب ارتفاع الكثافة العددية داخل المدرجات قررت ادارة بعض الكليات وضع عدد من انابيب الاكسجين داخل كل مدرج تحسبا لسقوط الطلبة
مغشيا عليها اثناء المحاضرات
نئير : سمعت يا نائر عن قرار الانابيب ؟
نائر : سمعت ازاى هو انا بروح الكلية اصلا .
نئير : ولية مش بتروح ؟
نائر : انا بذاكر فى البيت انما الحضور متعب اوى لو اتشجعت فى يوم وقررت انك تحضر محاضرة . طبعا هتضطر انك تدخل الى المدرج.
و الموضوع ده مش ساهل زى ماانت فاهم ده عايز استعدادات خاصة ؟
نئير : ياه للدرجة دى ؟ّّ!!
نائر : شوف يا سيدى فى البداية لازم تبقى واقف على باب المدرج قبل المحاضرة بحوالى نص ساعة ؟ عشان تلاقى مكان .
تانى حاجة لازم تلبس كمامة على وشك وانت داخل عشان النفس و الروايح الغريبة التى قد تضطر لشمها وانت تحاول الوصول لهدفك ؟ وحاول ان تتمسك بهدومك و كتبك على قد ماتقدر . المهم انك بعد ماتدخل - ده لو ربنا وفقك ودخلت- تتأكد انك دخلت كامل العدد
يعنى حاجتك كاملة و هدومك كل حتة لسة موجودة فى مكانها . الموضوع طبعا محتاج دراسة مش ساهل زى مانت كنت فاكر.
نئير : هو الباب عندكو ضيق للدرجة دى .
نائر : الباب حضرتك مكون من جناحين ( ضرفتين مش عارف احنا بننطقها كده بس انا حاسس انها بالعربى دلفتين )
المهم غالبا واحده بتبقى مقفولة ؟ ما تفهمش ايه السبب فى كده ؟
نئير : طب كمل رحلة البحث عن مدرج اللى كنت بتحكيها .
نائر : شوف يا سيدى بعد ما تمسك حاجتك و تندفع مع افواج الطلبة الثائرين تبدأ نفرة الطلبة من الخارج الى داخل المدرج و مع اول قدم تدخل الى المدرج يبدأ الصراع على المقاعد وفجأة تتحول سلالم المدرج الى ماراثون يشترك فية الطلبة من الجنسين و الهتافات تملأ الحناجر الله اكبر .
و بداخل كل واحد امل وعزيمة ان يكون لو نصيب فى مقعد من المقاعد الامامية او حتى الوسطانية او يارب الاخرانية ولو ذادت الارادة والتحدى الداخلى عند احدهم فانه قد يلجأ للجلوس على السلالم التى تخترق البنشات من كل جانب : واضعا تحته اسكتش او مذكرة او قد يكتفى فقط بالبنطلون .
نئير : طب لو ما لحقش .
نائر : لو مالحقش المقاعد المتعددة اللى قولتلك عليها ساعتها لن يبقى امامه سوى السلالم المشار اليها او الوقوف فى صفوف المهاجرين من الخارج الى الداخل التى تأخذ نصيبها من التعليم وقوفا
فمنهم من لم يلمس فى حياته الجامعية كرسيا او حتى درجة سلم . الواقفون فى الخلف ارحم حالا من آخرون يضطرون لتسلق جدران المدرج من اليمين واليسار و الجلوس على حواف الشبابيك الموجودة .
وهؤلاء عندما يجلسون على الشبابيك فهم يرتكبون الجريمة الاشنع فى حق الطلبة المحبوسين داخل المدرج بكمية الهواء غير المتجددة التى يحول دون تجددها الطلبة رواد الشبابيك . الغريب فى الامر ان بعض الدكاترة يحبون امتلاء المدجات على آخرها حتى ولو اضطر الطلبة اللى التعلق بحبال من السقف الى الارض . ودكاترة اخرون
يرفضون تماما مثل هذة المظاهر السيئة غير الآدمية .
نائر : عرفت بقى انا لية مش بأحضر.
نئير : بس اكيد لو حطولك انابيب اكسجين فى المدرج هتحضر ؟؟ّّّ!!
,والله هوه ده اللى بيحصل حقيقى