فاكر زمارة الخطر

فاكر..
زمارة الخطر..
وطفي النور..
وأكياس الرمل..
وقدام كل بيت ساتر..

فاكر..
أيام السهر..
والامتحانات..
وكوباية شاي من إيد أمك..
وانت بتذاكر..
كنت بتفرح لما تنجح..
أو حد يقول عليك شاطر..

فاكر الأمان..
ننام وفاتحين البيبان..
دلوقتي ف كل شارع لجنة..
وف كل بيت عساكر..

فاكر..
معقول عشان تعيش..
لازم تطاطي وتقضيها..
طيب وحاضر..
مين اللي قال..
البحر غادر..
ومين اللي قال..
إنك خلاص تعبان..
ومش قادر..
ومين اللي سماك..
شحات وعريان وصابر..
هو احنا توهنا من بعض..
هو إحنا ليه..
ماشين وبصين ف الأرض..
هو احنا لسه بنحلم..
وبنحاول وبنعافر..

سؤال لا كان ع البال ولا ع الخاطر..
أسأل عليك..
يقولوا نايم..
وتسأل علي..
يقولولك سافر..
واخد بالك..
دلوقتي ف كل ثانية..
بنسمع الزمارة..
وبدال الغارة ألف غارة..
لكن لا بيصحي شارع..
ولا حارة..
وكل واحد فينا محتاج..
مليون أمارة..
عشان يحس بالخطر..
ياه..
يا ساتر..

جميللللللللللللة
تسلم ايدك يافندم
جزاك الله خيرا

يا ريت نرد على بعض باى حاجة عشان نشجع بعض

مش كده ولا ايه

اى حد يخش اى موضوع يرد باى رد حتى ولو شكرا

جزاكم الله خيرا

قصيدة رائعه

عندك حق فعلا حاجة تخنق يا ساتر!!